बिसेस : किसान मन होही अउ पोठ, गरुवा मन के होही बने जतन, सिरतोन म नियाय वाले योजना हे “गो-धन”….जानव का कहत हे किसान मन…

फीचर स्टोरी। गोबर खरीदी ल लेके न काहि सोचे के बात हे, न हाँसे के बात हे. ये तो सिरतोन म नियाय के बात हे. काबर नियाय के बात हे ? नियाय के बात येखर सेती कि जेन गोबर अभी तक सिरिफ लिपे के काम आत रहिस, छेना थोपे के काम आत रहिस, उहि गोबर ह अब धन अरजन करे के काम घलोक आय लग हे. ये ह कोनो झूठ-लबारी के बात नोहय. ये सोला आना सत बात हरय. छत्तीसगढ़ सरकार ह अब किसान मन ले, गाय-गरुवा पालने वाला मन ले गोबर लेहे के सुरू कर दे हे. 

छत्तीसगढ़ म जब ले मुखिया भूपेश बघेल ह ये योजना ल सुरू करे हे चारो मुड़ा भइगे येखरे चरचा हे. का परदेस अउ का देस. सब कोति गोबर खरीदी के गोठ-बात होवत हे. वइसे होना भी चाही. काबर कि छत्तीसगढ़ सरकार ह देस के पहली अइसे सरकार हरय जेन सिरतोन म किसान अउ गाय मन के रक्छा खातिर नियाय करे हे. सरकार के ये योजना ले पूरा छत्तीसगढ़वासी मन ल लाभ होही. ये बात भले आज छत्तीसगढ़ के सबो निवासी मन नइ समझत होही, फेर गोबर खरीदी के लाभदायी असर एक-एक छत्तीसगढ़िया मन ऊपर अवइया बछर म दिखे लगही.

ये सब बात ल सरकार के बढ़ई म कहे अउ बताय के बात नइहे. ये तो समझे अउ जाने के बात हे. छत्तीसगढ़ म गोबर खरीदी के पीछे सरकार के मंसा ये हे कि किसान रयासनिक खेती ल छोड़ के जैविक खेती ल अपनाय. जइसे के हमर पुरखा मन पहली करत रहिन. गोबर के खातू-माटी ले हमर खेत-खार तो बने होबे करही, फसल घलोक अच्छा होही. खाय-पिये के जम्मों जिनिस अब सुद्ध मिलही, आर्गेनिक मिलही, जैविक मिलही. 

भूपेश सरकार ह गोबर खरीदी ल लेके बड़ दूरिहा के सोचे हे. अउ वोखर ये सोच ल अब छत्तीसगढ़ के किसान मन, छत्तीसगढ़िया मन समझे लगे हे. 

किसान के बेटा ह समझिस किसान मन के मरम ल

सरगुजा के किसान हेमंत कश्यप के कहिना हे कि छत्तीसगढ़ के मुखिया ह किसान के बेटा हरय. किसान बेटा ह किसान मन के मरम ल सझत हे. मुखिया ये बात ल जानत हे कि आज गाय-गरुवा म ल पालना बड़ खरचा के बुता हे. अइसे म अब गोबर खरीदी ले किसान गोबर बेच के चारा के बेवस्था बने कर सकत हे. मतलब गाय-गरुवा ल पाले मन जेन खरचा आहि वोखर भरपाई गो-धन ले कर सकत हे. सिरतोन म ये बड़ हित के योजना हरय.